Հայաստանի Հանրապետության սպառողական շուկայում 12-ամսյա գնաճը (2021թ. մայիսը 2020թ. մայիսի նկատմամբ) կազմել է 5.9%, իսկ նախորդ ամսվա նկատմամբ գրանցվել է 0.4% գնանկում:
2021թ. հունվար-մայիսին սպառողական գների միջին ամսական հավելաճը կազմել է 0.9% (նախորդ տարվա նույն ժամանակահատվածում արձանագրվել է 0.5% հավելաճ): Հանրապետության դիտարկվող բոլոր քաղաքներում 2021թ. մայիսին ապրիլի համեմատ սպառողական գները նվազել են 0.5-0.1%-ով, այդ թվում, գնանկման համեմատաբար բարձր ցուցանիշն արձանագրվել է Երևան և Եղեգնաձոր քաղաքներում:
Սննդամթերքի գներ
2021թ. մայիսին 2020թ. մայիսի համեմատ հանրապետությունում արձանագրվել է սննդամթերքի և ոչ ալկոհոլային խմիչքի 7.5% գնաճ, իսկ 2021թ. ապրիլի համեմատ՝ 1.0% գնանկում: Վերջինիս մեծապես նպաստել են բանջարեղենի, մրգի, կաթնամթերքի, պանրի և ձվի 7.0-1.3% գնանկումները: Բանջարեղենի ապրանքախմբում 2021թ. մայիսին 2020թ. մայիսի համեմատ արձանագրվել է 6.3% գնաճ, իսկ 2021թ. ապրիլի համեմատ՝ 7.0% գնանկում:
2021թ. մայիսին ապրիլի համեմատ մրգի և բանջարեղենի ապրանքախմբերի ընդհանուր գնանկումը կազմել է 5.8%: Վերը նշված ապրանքախմբերը սպառողական զամբյուղում ունենալով 8.35% տեսակարար կշիռ, նշված ժամանակահատվածում նպաստել են սպառողական գների ընդհանուր մակարդակի նվազմանը 0.5 տոկոսային կետով:
Կաթնամթերք, պանիր և ձու ապրանքախմբում 2021թ. մայիսին 2020թ. մայիսի համեմատ գրանցվել է 11.5% գնաճ, իսկ 2021թ. ապրիլի համեմատ՝ 1.3% գնանկում: Ձվի գինը 2021թ. մայիսին 2020թ. մայիսի համեմատ աճել է 46.1%-ով, իսկ 2021թ. ապրիլի համեմատ գրանցվել է 4.8% գնանկում: 2021թ. մայիսին 2020թ. մայիսի համեմատ մսամթերքի ապրանքախմբում գրանցվել է 5.3%, իսկ 2021թ. ապրիլի համեմատ՝ 0.9% գնաճ: Շաքարի և շաքարավազի ապրանքախմբում 2021թ. մայիսին 2020թ. մայիսի համեմատ գրանցվել է 43.3%, իսկ 2021թ. ապրիլի համեմատ՝ 1.9% գնաճ:
Յուղերի և ճարպերի ապրանքախմբում 2021թ. մայիսին 2020թ. մայիսի համեմատ արձանագրվել է 33.4%, իսկ 2021թ. ապրիլի համեմատ՝ 3.6% գնաճ (արևածաղկի բուսական յուղի միջին գնաճը 2021թ. մայիսին 2020թ. մայիսի համեմատ կազմել է 84.4%, իսկ 2021թ. ապրիլի համեմատ՝ 6.0%): Ձկան և ծովամթերքի ապրանքախմբում 2021թ. մայիսին 2020թ. մայիսի համեմատ արձանագրվել է
14.4%, իսկ 2021թ. ապրիլի համեմատ՝ 4.8% գնաճ:
Ալկոհոլային խմիչքի և ծխախոտային արտադրատեսակների ապրանքախմբում 2021թ. մայիսին 2020թ. մայիսի համեմատ արձանագրվել է 8.7%, իսկ 2021թ. ապրիլի համեմատ՝ 1.0% գնաճ: Ալկոհոլային խմիչքի միջին գնաճը 2021թ. մայիսին 2020թ. մայիսի համեմատ կազմել է 8.7%, 2021թ. ապրիլի համեմատ՝ 0.7%, իսկ ծխախոտային արտադրատեսակներինը՝ համապատասխանաբար 8.7% և 1.5%: 2021թ. մայիսին ապրիլի համեմատ հանրապետությունում արձանագրվել է հացաբուլկեղենի և ձավարեղենի՝ 0.5%, ոչ ալկոհոլային խմիչքի՝ 0.6%, սուրճի, թեյի, կակաոյի 0.7% գնաճ:
Ոչ պարենային ապրանքների գներ
2021թ. մայիսին 2020թ. մայիսի համեմատ ոչ պարենային ապրանքների շուկայում գրանցվել է 9.0% գնաճ, իսկ 2021թ. ապրիլի համեմատ պահպանվել է գների հարաբերականորեն կայուն մակարդակ:
2021թ. մայիսին ապրիլի համեմատ հանրապետությունում գրանցվել է կահույքի և կահավորանքի, գորգերի և հատակի ծածկերի՝ 0.2%, ապակե ամանեղենի, ճաշասպասքի և տնային կահ-կարասու, կենցաղային և այգեգործական գործիքների, վառելանյութերի և քսանյութերի՝ 0.5%, տարբեր տեսակի կոշկեղենի, ոսկերչական զարդերի՝ 0.7%, խոշոր կենցաղային սարքերի՝ 0.8%, կենցաղային փոքր էլեկտրական սարքերի 1.2% գնաճ: Միաժամանակ, բնակարանի նորոգման և սպասարկման համար նյութերի գները նվազել են 0.3%-ով, դեղագործական ապրանքներինը՝ 0.2%-ով, իսկ հագուստի, մաքրող, լվացող միջոցների ապրանքախմբերում գների մակարդակը նախորդ ամսվա համեմատ մնացել է անփոփոխ:
2021թ. մայիսին ապրիլի համեմատ բենզինի և դիզելային վառելիքի գներն աճել են 3.0% և 5.4%-ով։ 2021թ. մայիսին 2020թ. մայիսի համեմատ հանրապետությունում գրանցվել է բենզինի և դիզելային վառելիքի՝ համապատասխանաբար 49.6% և 38.3%, իսկ 2020թ. դեկտեմբերի համեմատ՝ 21.6% և 32.0% գնաճ։
Ծառայությունների սակագներ
Մատուցված ծառայությունների ոլորտում 2021թ. մայիսին 2020թ. մայիսի համեմատ արձանագրվել է սակագների 2.2% հավելաճ, իսկ 2021թ. ապրիլի համեմատ՝ 0.2% նվազում: 2021թ. մայիսին ապրիլի համեմատ հանրապետությունում գրանցվել է բնակարանի նորոգման և սպասարկման ծառայությունների՝ 0.3%, սպասարկման ծառայությունների՝ 0.8%, հյուրանոցային ծառայությունների՝ 2.0%, հանգստի կազմակերպման ծառայությունների սակագների 2.9% հավելաճ: Միաժամանակ, հանրապետությունում արձանագրվել է հանգստի և մշակութային միջոցառումների հետ կապված ծառայությունների սակագների 0.1% նվազում, իսկ կենցաղային սարքերի նորոգման, վարսավիրանոցների և անձնական սպասարկման սրահների ծառայությունների սակագների մակարդակը նախորդ ամսվա համեմատ մնացել է անփոփոխ:
Արտարժույթի շուկա
2021թ. մայիսին ապրիլի համեմատ սպառողական և արտարժույթի շուկաներում արձանագրվել է գների և ԱՄՆ դոլարի նկատմամբ հայկական դրամի հաշվարկային փոխարժեքի՝ համապատասխանաբար 0.4% և 0.8% նվազում (ՀՀ դրամն արժևորվել է): 2021թ. մայիսին 2020թ. դեկտեմբերի համեմատ հանրապետությունում գրանցվել է սպառողական գների և ԱՄՆ դոլարի նկատմամբ հայկական դրամի հաշվարկային փոխարժեքի 4.7% և 0.5% հավելաճ: Նախորդ տարվա նույն ժամանակահատվածում արձանագրվել է սպառողական գների և ԱՄՆ դոլարի նկատմամբ հայկական դրամի հաշվարկային փոխարժեքի 2.5% և 1.2% հավելաճ: 2021թ. մայիսին ԱՄՆ դոլարի նկատմամբ հայկական դրամի միջին հաշվարկային փոխարժեքը կազմել է 521. դրամ, ինչը 7.7%-ով բարձր է 2020թ. մայիսի համապատասխան ցուցանիշից (484.1 դրամ):
