Հունիսի 2-ին ՀՀ ԱԺ տնտեսական ու ֆինանսավարկային եւ բյուջետային հարցերի մշտական հանձնաժողովների համատեղ նիստում քննարկվեցին «ՀՀ 2020թ. պետական բյուջեի կատարման մասին» Ֆինանսների, Էկոնոմիկայի, Տարածքային կառավարման եւ ենթակառուցվածքների, Բարձր տեխնոլոգիական արդյունաբերության նախարարությունների, Հանրային ծառայությունները կարգավորող եւ Տնտեսական մրցակցության պաշտպանության պետական հանձնաժողովների, Պետական եկամուտների, Կադաստրի, Քաղաքաշինության կոմիտեների տարեկան կատարողականները:
ՀՀ ֆինանսների նախարարության պատասխանատվության ներքո նախատեսված 4 ծրագրերի շրջանակներում 2020-ի պետական բյուջեի մասին օրենքով հատկացվել էր շուրջ 171.2 մլրդ դրամ, ապահովվել 98.8 տոկոս կատարողական: Ըստ Ֆինանսների նախարարի պաշտոնակատարի՝ նախորդ տարվա համեմատ նախարարության ծախսերն աճել են 4.1 տոկոսով կամ 6.6 մլրդ դրամով՝ հիմնականում պայմանավորված պետական պարտքի կառավարման ծրագրի շրջանակներում կատարված ծախսերի աճով:
Անդրադառնալով 2020-ի ընթացքում պետական համակարգում տրված պարգեւավճարների չափին, նախարարի պաշտոնակատարը տեղեկացրեց, որ պետական կառավարման համակարգում աշխատակիցների համար նախատեսված հանրագումարային հատուցման միջին ցուցանիշն ամսական 360 հազար դրամ է: Նույն թվականին, ըստ հաշվարկային մեծության, 19 հազար 709 մարդ զբաղված է եղել պետական կառավարման համակարգում, որոնց աշխատանքի վարձատրության համար նախատեսված է եղել 87.4 մլրդ դրամ:
2020-ին բարձր տեխնոլոգիական արդյունաբերության նախարարության բյուջեն կազմել է 9 մլրդ դրամ, իսկ փաստացի ծախսերը՝ 8.4 մլրդ դրամ:
«Անշարժ գույքի կադաստրի վարման բնագավառում պետական քաղաքականության իրականացում» ծրագրի իրականացման համար 2020-ի պետական բյուջեի մասին օրենքով հատկացվել էր 5.2 մլրդ դրամ: Ճշտված ծրագրային ցուցանիշը կազմել է շուրջ 3.9 մլրդ դրամ, ծախսերը՝ 3.7 մլրդ դրամ՝ ապահովելով 97.2 տոկոս կատարողական:
2020-ին քաղաքաշինության կոմիտեին հատկացվել է շուրջ 4 մլրդ դրամ: Նախորդ տարվա համեմատ՝ ծախսերը նվազել են 89.4 տոկոսով:
Էկոնոմիկայի նախարարությանը նախատեսված 12 ծրագրերի իրականացման համար հատկացվել էր 34.1 մլրդ դրամ: Տարվա ընթացքում կատարված փոփոխություններով, մասնավորապես՝ համավարակի կանխարգելման նպատակով, 20.8 մլրդ դրամ միջոցներ են հատկացվել ճգնաժամերի հակազդմանը եւ արտակարգ իրավիճակների հետեւանքների նվազեցմանն ու վերացմանը միտված ծրագրի իրականացման համար: Կատարողականը եղել է շուրջ 82 տոկոս:
Համավարակով եւ պատերազմով պայմանավորված՝ ՊԵԿ-ն աշխատանքը 2020-ին կազմակերպել է ստեղծված իրավիճակին համապատասխան: Միջոցառումների մի մասն ուղղված է եղել օրինախախտ հարկ վճարողների դեմ պայքարին եւ ստվերային տնտեսության կրճատմանը: Հարկային վարչարարության եւ բիզնես միջավայրի բարելավման նպատակով իրականացվել են բարեփոխումներ: Իրականացվել է հակաճգնաժամային 5 միջոցառում:
Կառույցը հարկ վճարողներին էլեկտրոնային եղանակով ուղարկել է մոտ 25 հազար ծանուցում, ստացել՝ 5 հազար բացատրություն: Սեպտեմբերի տվյալների համաձայն՝ եկամուտ-հարկման բազա ապահոված աշխատատեղերի քանակը կազմել է 632 հազար, եկամուտ ապահոված աշխատատեղերինը՝ 636.6 հազար: Համեմատության համար նշվեց, որ այս թիվը 2019-ին պակաս է եղել 18 հազարով:
Հաշվետու տարում համալիր հարկային ստուգումները, վերստուգումներն ու լուծարային ստուգումները 2019-ի համեմատ նվազել են 10.2 տոկոսով: Սա ՊԵԿ որդեգրած քաղաքականության շրջանակում է, որի նպատակն է նվազեցնել ստուգումների քանակը եւ գործել հնարավորինս հասցեական:
2020-ի ընթացքում կառույցն իրականացրել է մոտ 14 հազար թեմատիկ ստուգում, ինչը 2019-ի համեմատ ավելի է եղել 2400-ով կամ 21 տոկոսով: Հաշվետու տարում իրականացվել է 12 հազարից ավելի ՀԴՄ ստուգում, որը նախորդ տարվա համեմատ ավելի է եղել 3100-ով կամ ավելի քան 34 տոկոսով: 2020-ին հարկային եկամուտները կազմել են 1 տրիլիոն 385.2 մլրդ դրամ, իսկ հարկեր-ՀՆԱ ցուցանիշը՝ 22.4 տոկոս:
ՊԵԿ-ի ծախսերը 2020-ին կազմել են մոտ 29.3 մլրդ դրամ, իրականացվել է 10 միջոցառում, կատարողականը կազմել է 28.8 մլրդ դրամ: Կոմիտեում կատարվել են կառուցվածքային փոփոխություններ: Գործառույթների կրկնման պատճառով 52-ով կրճատվել է հաստիքների թիվը:
ՀՀ տարածքային կառավարման եւ ենթակառուցվածքների նախարարությունը հաշվետու տարում պատասխանատու է եղել 22 ծրագրի իրականացման համար: 181 միջոցառման իրականացման համար հատկացվել է 207.9 մլրդ դրամ՝ նախատեսված 243 մլրդի դիմաց, կատարողականը կազմել է 85.6 տոկոս:
