2025 թվականին Հայաստանում գիտություն գրեթե չի մնալու, սա դառնում է ակնհայտ, երբ ծանոթանում ես վիճակագրությանը։ Այս մասին ԱԺ լսումների ժամանակ ասաց ռոբոտաշինության ինժեներ, Robomart ընկերության համահիմնադիր Տիգրան Շահվերդյանը։ Նա նշեց՝ Հայաստանում գիտական աստիճան ունեցող գիտաշխատողների 40 տոկոսը կենսաթոշակային տարիքի են, իսկ ղեկավարների 50 տոկոսն է կենսաթոշակային տարիքի։
«Բերեմ օրինակ, թե ինչո՞ւ է այս իրավիճակն աղետալի։ Հայաստանում այս պահին չկա կառավարման համակարգերով զբաղվող գոնե մեկ առաջադեմ գիտական խումբ, որի հետ ավտոմատ համակարգեր, մասնավորապես, ԱԹՍ-ներ նախագծող ընկերությունները կարող են համագործակցել»,- ասաց նա։
Գիտական քաղաքականություն մշակողն ու իրականացնողը, Շահվերդյանի խոսքով, գիտնականը չէ, դա պետության գործառույթն է։ Իսկ 30 տարիների ընթացքում մեր պետության քաղաքականությունը բերել է գիտության գրեթե վերացմանը։
«Հայաստանում վաղուց արդեն գոյություն չունեն համակարգչային գիտությունների ճյուղեր։ 30 տարիների ընթացքում Հայաստանում գիտաշխատողների քանակը յոթապատիկ նվազել է՝ 1 մլն բնակչության հաշվով աշխարհի առաջին երկրների ցուցանիշից հասնելով եվրոպական միջինից 2 անգամ քիչ ցուցանիշի։ Գիտության զարգացման ծրագրերը եղել են ու կան, բայց անհայտ պատճառներով այդ ծրագրերի մեջ ներդրումներ չեն արվել ու չեն արվում։ Գիտական հետազոտությունների և փորձարարական մշակումների համար Հայաստանում հատկացվում է ՀՆԱ-ի 0,25 տոկոսը։
Հարգելի պատգամավորներ, պատասխանատուներ, դուք ունեք պատմական հնարավորություններ մեր կողմից վճարած հարկերի ճիշտ վերաբաշխմամբ վերածնել հզոր գիտությունը Հայաստանում։ Մենք այլևս ժամանակ չունենք, գիտության առաջնահերթությունը մեզ համար պետք է կանոն դառնա և ֆիքսվի օրենքով։ Բարձր տեխնոլոգիական արդյունաբերության բնագավառի մի շարք գործարարներով առաջարկում ենք օրենքում ամրագրել, որ գիտական և գիտատեխնիկական գործունեության համար պետական հատկացումները պետք է աստիճանաբար աճեցնելով՝ 2024 թվականին հասցվի բյուջեի առնվազն 4 տոկոսին, այսինքն՝ ՀՆԱ-ի առնվազն 1 տոկոսին»,- ասաց Տիգրան Շահվերդյանը։
Նյութի սկզբնաղբյուրը` lragir.am:
