Apple-ը սմարթֆոնների, ծրագրային ապահովման և պլանշետների խոշորագույն արտադրողներից մեկն է ամբողջ աշխարհում։ Իր բարձր որակի շնորհիվ Apple-ի արտադրանքը գնահատվում է ամենուրեք։ Ներկա պահին Apple ընկերությունը գնահատվում է ավելի քան 1 տրլն դոլար։ Ընկերությունը անընդհատ փորձում է կատարելագործել իր արտադրանքը և փնտրել նորարարական լուծումներ գոյություն ունեցող խնդիրների համար։
Ընկերության պաշտոնական ծնունդը 1976 թվականի ապրիլի 1-ն է։ Այդ օրը Սթիվ Ջոբսը և Սթիվ Վոզնյակը ստեղծեցին իրենց առաջին համակարգիչը, որը ստացավ Apple Computer անվանումը։
Apple Computer
Տարբերանշանի պատմությունը
Apple-ի առաջին տարբերանշանում պատկերված էր Իսահակ Նյուտոնը, ով հենված էր խնձորենուն։ Ծառի վերին ճյուղերից մեկից կախված էր կծած խնձորը, որը որոշ տեսակետների համաձայն կապված է նաև աստավածաշնչյան գայթակղության հայտնի իրավիճակի հետ (Apple-ի համակարգիչները նույնքան գայթակղիչ են, որքան աստվածաշնչյան խնձորը)։ Պետք է նշել նաև, որ Macintosh մոդելի համակարգիչները անվանվել են խնձորի տեսակի անվան պատվին, որը շատ էր սիրում էր Սթիվ Ջոբսը։
Սակայն առաջին տարբերանշանը հիշվող չէր և դրանով չէր համապատասխանում զանգվածային վաճառքների համար։ Այնուհետև Apple-ի տարբերանշանի պատմությունը մտավ նոր փուլ։ Դիզայներ Ռոբ Յանոֆը փողոցով զբոսնելուց մտավ տեղական սուպերմարկետը և գնեց մի քանի խնձոր։ Տուն գալուց հետո նա սկսեց կտրտել դրանք և նայել տարբեր անկյուններից, ինչից հետո պատկերեց մոնոխրոմ «կծած» խնձոր։
Ջոբսը հավանեց այդ էսքիզը, սակայն որոշեց, որ ավելի լավ կլինի ներկել այն։ Գովազդային գործակալության ղեկավարը դեմ էր այս որոշմանը, քանի որ այն ժամանակ գունավոր տպագրությունը շատ թանկ արժեր։ Սակայն Ջոբսը հետ չկանգնեց իր որոշումից, և շուտով Apple-ի համակարգիչների վրա հայտնվեց խնձորի հայտնի տարբերանշանը։
Գույների հերթականությունը ընտրվել էր պատահականորեն։ Միայն ամենավերին հատվածում գտնվող կանաչ գույնը ընտրել էր Ջոբսը։ Խնձորի տեսքը չէր փոխվում ավելի քան քսան տարի, որից հետո այն սկսեց ներկվել սև, սպիտակ և մոխրագույն գույներով։
Առաջին համակարգիչները
1976 թվականի գարնանը կենցաղային տեխնիկայի ամերիկյան խանութներում հայտնվեց Apple Computer I մոդելը, որն արժեր 666,66 դոլար։ Մի քանի ամիսների ընթացքում հիմնադիրներին հաջողվում է պատրաստել և վաճառել 175 այդպիսի համակարգիչներ։ Հաջորդ տարի ընկերության տնօրենի պաշտոնը սկսեց զբաղեցնել Մայքլ Սքոթը։
Ի հայտ եկավ համակարգչի նոր մոդելը, որը կրում էր Apple II անվանումը։ Դա առաջին համակարգիչն էր, որն ուներ գունավոր գրաֆիկա։ Դրանով Apple ընկերության զարգացումը մտնում է նոր փուլ։ Տեխնիկայում ներդրված էին փոքրիկ խոսնակ և հատուկ հրամաններ՝ ձայնը կառավարելու համար։ Համակարգիչն ուներ նաև սնուցման համակարգ և ստեղնաշար։ Apple II-ը բեկումնային արտադրանք էր այն ժամանակաշրջանի համար։ Այն դարձավ առաջին համակարգիչը, որը վաճառվեց ավելի քան 1 միլիոն անգամ։ Պետք է հիշատակել, որ մինչև 1993 թվականը վաճառվեց ավելի քան 5 միլիոն Apple II մոդելի համակարգիչ։
Apple II
Macintosh
1980-ականների սկիզբը բավական դժվար ժամանակաշրջան էր ընկերության համար։ Աշխատակիցների ոչ պատշաճ վարքագծից դժգոհ լինելու պատճառով Ջոբսը ստիպված էր աշխատանքից ազատել 40 հոգու։ Այդ տարիներին էլ Apple-ը դուրս եկավ NASDAQ ֆոնդային բորսա։ Սակայն այդ քայլը սպասվող ազդեցություն չունեցավ, ընկերության բաժնետոմսերն անկում էին ապրում, իսկ թերթերում սկսեցին լուրեր շրջանառվել ընկերության մոտակա մայրամուտի մասին։
Իրավիճակը սկսեց փոխվել 1983 թվականին, երբ ընկերության նախագահ դարձավ տաղանդավոր մենեջեր Ջոն Սքալլին։ Մինչ Apple-ում պաշտոն ստանձնելը նա բավական մեծ հաջողություններ գրանցեց Pepsi ընկերությունում։
1984 թվականի մարտի 22-ին Apple-ը հանրությանը ներկայացրեց առաջին Macintosh-ը, որը արմատապես փոխեց մարդկանց պատկերացումը անհատական համարկագիչների նկատմամբ։ Macintosh-ը հանդիսացավ առաջին տեխնիկան, որի մոնոբլոկում առկա էր միջին վիճակագրական օգտատիրոջն անհրաժեշտ ցանկացած գործիք։ Այդ իրադարձութունը նոր փուլ էր Apple-ի պատմության մեջ։ Պետք է նշել նաև, որ Macintosh-ի գովազդային հոլովակն արժանացավ Կաննի մրցանակի։ Մինչ այժմ այն համարվում է ամենայուրահատուկ գովազդներից մեկը Apple-ի պատմության մեջ։
Macintosh
Macintosh-ը վաճառվում էր 2495 դոլարով։ Նրա ստեղծողները փորձում էին նախագծել այնպիսի մի տեխնիկա, որը հաշված րոպեներում կարող էր հասկանալ յուրաքանչյուր օգտատեր՝ չունենալով որևէ որակավորում։
Ժամանակը գնում էր, և նոր օպերացիոն համակարգ ստեղծելու անհրաժեշտություն առաջացավ։ Երկարատև քննարկումներից հետո որոշվեց օգտագործել NeXT անվանումով ընկերության ժամանակակից լուծումները։ Նոր նախագծված օպերացիոն համակարգը ստացավ Mac OS X անվանումը և կառուցված էր այնպես, որ հին օգտատերերը կարող էին առանց մեծ դժվարությունների անցնել նոր օպերացիոն համակարգի օգտագործմանը։
Սթիվ Ջոբսի ընկերությունից դուրս գալը և վերադարձը
1985 թվականը բեկումնային էր Apple-ի պատմության մեջ։ Այդ ժամանակ ԱՄՆ նախագահ Ռոնալդ Ռեյգանը Սթիվ Վոզնյակին և Սթիվ Ջոբսին պարգևատրում է շքանշանով ՏՏ ոլորտում գրանցած հաջողությունների համար։ Նույն տարում Ջոբսը լքում է ընկերությունը՝ վիճելով տնօրենների խորհրդի անդամների հետ։ Դրա հետ մեկտեղ անհատական համակարգիչների վաճառքի ծավալները և բաժնետոմսերի գները կտրուկ անկում են ապրում։ Մասնագետները դա կապում էին Ջոբսի լքելու հետ, քանի որ նա շատ յուրօրինակ կերպով էր գովազդում ընկերության արտադրանքը։ Եվ շատերը կարծում էին, որ դրանով ընկերության զարգացման պատմությունը մոտենում էր ավարտին։ Սակայն ընկերությունը շարունակում է մնալ շահութաբեր և չի դադարեցնում իր գործունեությունը։
1995-97 թվականներին Apple-ը սկսում է կորուստներ կրել, իսկ 1990-ականների վերջերին դրանք հասնում էին գրեթե 2 մլրդ ԱՄՆ դոլարի։ Տնօրենների խորհուրդը որոշում կայացրեց վերադարձնել Սթիվ Ջոբսին։
2000-ականների հեղափոխությունը
2001 թվականին համակարգչային տեխնիկայի շուկայում հայտնվեց iPod երաժշտական նվագարկիչը։ Իր հնարավորությունների շնորհիվ այդ կոմպակտ սարքավորումն անմիջապես մեծ տարածում ստացավ ամբողջ աշխարհում։ 2003 թվականին համացանցում բացվեց առցանց խանութ, որտեղ վաճառվում էր երաժշտություն այդ նվագարկիչներով լսելու համար։ Առցանց խանութը ստացավ iTunes Store անվանումը։
iPod
2007 թվականին ընկերությունը ներկայացրեց առաջին սմարթֆոնը՝ iPhone-ը։ Իսկ 2008 թվականին համացանցում բացվեց App Store անվանումով նոր առցանց խանութ, որի աշխատանքի մեխանիզմների և վճարման քաղաքականությունը ընդհանուր առմամբ կրկնում է iTunes-ին։
iPhone
Apple-ը չէր բավարարվում գրանցված հաջողություններով։ Ընկերությունը անընդհատ շարունակում էր փնտրել սպառողական նոր շուկաներ՝ եկամուտներն ավելացնելու նպատակով։ 2010 թվականին առաջին անգամ շուկա մուտք գործեց առաջին պլանշետը՝ iPad անվանումով։ Իրացման առաջին ամսվա ընթացքում վաճառվեց ավելի քան 1 միլիոն պլանշետ։
iPad
Apple-ի 2000-ականների հսկայական քայլերը նրան թույլ տվեցին 2011 թվականին դառնալ աշխարհի ամենաթանկ առևտրային կազմակերպությունը։ Այժմ ընկերության շուկայական կապիտալիզացիան կազմում է 1,15 տրլն ԱՄՆ դոլար, և այդ ցուցանիշով Apple-ը զիջում է միայն Microsoft-ին (1,26 տրլն ԱՄՆ դոլար)։
